ភ្នំពេញ៖ នាយករដ្ឋមន្ត្រីកម្ពុជា សម្ដេចតេជោ ហ៊ុន សែន បានសំដែងនូវការសោកស្ដាយចំពោះការបាត់បង់ដោយសារសង្គ្រាមនៅក្នុងប្រទេសអ៊ុយក្រែន ខណៈសម្ដេចបានប្រាប់ទៅប្រធានាធិបតីអ៊ុយក្រែនថា «គ្មានសង្គ្រាមណាមួយអាចបញ្ចប់បានដោយប្រើប្រាស់សង្គ្រាមនោះទេ»។ 

សម្ដេចតេជោបានលើកឡើងបែបនេះក្នុងជំនួបជាមួយនឹងលោកប្រធានាធិបតីអ៊ុយក្រែន វ៉ូឡូឌីមៀ ហ្ស៊ែលឡិនស្គី តាមទូរសព្ទកាលពីម៉ោង ៤រសៀល ថ្ងៃទី០១ ខែវិច្ឆិកា ឆ្នាំ២០២២ ម្សិលមិញ។ 

ក្នុងសេចក្ដីប្រកាសព័ត៌មានរបស់ក្រសួងការបរទេសបានឲ្យដឹងថា ក្នុងជំនួបតាម ទូរស័ព្ទនោះ សម្ដេចតេជោ បានលើកឡើងពីបទពិសោធន៍របស់កម្ពុជានិងបានជំរុញឲ្យប្រទេសអូយក្រែន និងរុស្ស៊ី បង្កើតនូវការចរចាដើម្បីស្វែងរកនៅដំណោះស្រាយ។ 

ក្នុងសេចក្ដីប្រកាសព័ត៌មាននោះបានឲ្យដឹងថា៖ «សម្តេចតេជោនាយកដ្ឋមន្ត្រី បញ្ជាក់ថា កម្ពុជាផ្តល់សារសំខាន់ដល់ការចរចា និងដំណោះស្រាយដោយសន្តិវិធី និងសង្ឃឹមថាភាគីពាក់ពន្ធ័ទាំងអស់នឹងខិតខំរកដំដោះស្រាយគ្រប់ជ្រុងជ្រោយដើម្បីបញ្ចប់សង្រ្គាមនៅ អ៊ុយក្រែន ដើម្បីអ៊ុយក្រែនទទួលបានមកវិញនូវសុខសន្តិភាព ស្ថិរភាព បូរណភាពទឹកដី និងការអភិវឌ្ឍន៍»។ 

កម្ពុជាគឺជាប្រទេសមួយដែលជំទាស់ជានិច្ចលើការឈ្លានពានរបស់រុស្ស៉ីនេះដោយបង្ហាញឡើងតាមរយៈការបោះឆ្នោតប្រឆាំងការលុកលុយ និងទាមទារឱ្យរុស្ស៊ីដកទ័ពចេញពីទឹកដីអ៊ុយក្រែន ទោះជាយ៉ាងប្រទេសកម្ពុជាក៏មិនគាំទ្រការដាក់ទណ្ឌកម្មលើរុស្ស៉ីផងដែរដោយចាត់ទុកថាសកម្មភាពទណ្ឌកម្មលើរុស្ស៊ីនឹងបង្ករការខាតបង់កាន់តែខ្លាំង៕